Jut Olo Iyoswo loso Jut Mtɨ'mokumentisofoho.

Olo hungkuno somo'mjofoho.

Jisas ahwomomne'no nto sɨmentiso sohonta soswoteti'nji (30)teti-faifɨ'nji (35) nto uyakolo'mentisopolɨkeno olo iyoswo loso Jut mtɨ'mokumentisofoho. I oso'no oso yofe Jutɨye so'nji Jutasɨye so'nji afafoho. (Oso'no Matɨyu sohe engo 13, hanɨngkano we'e 55 so'nji Mak sohe engo 6, honɨngkano we'e 3, osopo Jisasɨye hohmnɨngkwa'wehwosamne'no yofe hi'njoponoho.) I oso'no hofɨkoe hunoso olenoho. Olo iyoswo loso Jisasɨye nɨngkwahwo mtɨ'mokmentisofoho. Jut a'amu Jisasɨmo inɨngkunyo somne'no mtɨ'mokumentisofoho. Iyoswo hiloso a'amu ango ntɨponjomne'no mtɨ'mokumentisotɨkeno. O'o, nakwo huno monayofoho. Olo iyoswo lomjo hungkuno sɨmo'mjoso olenoho. Sekwo nakwo sɨmeho hi'ntnnonohinoso aho yokumpohn'nyo kemokosyohumafɨkuji a'amu hwayo hungkuno'njo sohwafe hungkuno somo nupa'nɨngkutoho. Jut ose ulɨmonto mtɨ'mokumentisofoho. (Hungkuno hiso Jut honɨngkano we'e 3 osopo weho.) Oso'no olo iyoswo hiloso ntɨpo humanto mtɨ'mokumentisotɨkeno. Ango kako nohumanto olo iyoswo loso mtɨ'mokumentiso so'no malinyofoho. Oso'no olo hungkuno homo lomo atofo lɨhwasi tɨfi unɨngkohwano.

Jude

1Ngko Jut sohwo'ni Jisas Kɨlaisɨye syoho ulohofiyo Jemɨsɨye konɨngkwa'we hwo'nyoho. Anɨtuye a'amu soku ngko olo iyoswo loso sekwo a'amu Anɨtu sehwosopeehonɨngki inɨngkamentohofo sokune'no mtɨ'mokalokweno. Mpohwo Anɨtu sɨmeho engo sejopahonɨngki Jisas Kɨlais kako sekumo wopɨngo semokosyohumaho. 2Anɨtu kako sekune'no hitoho ulofɨhwoso'no sɨmeho pompenjiyo so'nji sɨmeho hitoho so'nji wosejapono. Oso hiso sejaposo so'no engo imo'nyo'ne'enji Anɨtumo jomo ulalokweno.

Kɨlais Jisasɨye hungkuno somne'no hwasyo hungkuno lutɨhwawo'nɨngkohofo sofe hungkunofoho.

3Nje a'amu soku, sɨmo'mo ngko huno pi'nɨngo syafɨsyonji Anɨtu kako asomo netɨmayo'neso sekune'no iyoswo mtɨ'mokumne'enji i olohonta nom'ne hungkuno mtɨ'mokalokweno. Nakwo Jisas Kɨlaisɨmo sɨmeho hi'ntnnono uyaso hn'nɨmo Anɨtu kako asomo wonetɨma'mtonoho. Oso hungkuno Anɨtu nejapmmentisoso sekwo syoho yokumpohn'nyo ikuji sɨmeho hi'ntnnono uyalokwofo soku, sekwo aho yokumpohn'nyo fɨkemokosyohumamno. Oso'no sekwo nom'ne hungkuno hwasyo somo nupa'nɨngkutoho. O'o, hungkuno hwasyo homo somo filommjahumno. 4A'amu fehohnjo Anɨtumne'no sekwo'nji uhu'mokontɨfi humentanɨngkofi a'amu fehohnjoso hofɨko nom'ne huno so'nji hiyaso motohusosyohumantɨfi hofɨko poji ehumamentohofofoho. A'amu hiso hofɨko ole lalokwofo, Anɨtu kako nakumo wopɨngo naloho'mentiso so'no nakwo kakine'no iyoho monanɨngkiyohoho. Yo'mayo wonyo nakwoe sɨmeho uyɨmo lososo u uyɨhwono. Anɨtu kako sɨmeho nejopalokuso sohwo kako tohino monejaponehoho. Ose lalokwofo sohwa nakwoe Hwe Engo Jisas Kɨlaisɨmne'no hofɨko hohujo ikinjao'mentohofofoho. Hohonta a'amu Anɨtuye hungkuno mtɨ'mokumentohofo sohwa olo a'amu lohwamne'no ole mtɨ'mokumentohofo, Oso a'amuso wonyofoho. Hofɨko tɨkanomo ufitnnefoho. Ose mtɨ'mokumentohofofoho.

5A'amu oso yahino'njo somne'no sekwo nto upa'nɨmentohofofoho. I oso'no ngko sekwoe huno somo huno apa'no wasefohoto'mne'no yohono. A'amu Isɨlael somo nakwoe Hwe Engo hofɨkimo Ijip mta'ni utɨmanto olopono utɨmotapmmentisofoho. Oseso hwe moya'mi Isɨlael fehohnjoso hofɨko Anɨtumne'no nakwolaho lontɨfi hohujo ikinjɨmofahonɨngkofi Anɨtu kako hofɨkimo poyo umokumentisofoho. 6Nom'ne so'no huno fɨsyafɨhupmno. A'amu ahwomomjo fehohnjoso oso syoho Anɨtu uyɨmentiso somne'no hahn'nyo yontɨfi hofɨkoe ahwomomjo pone ulɨko'ma'mentohofofoho. Oseso Anɨtu kako hofɨkimo ahwomo nano'nji intofonto sɨkwo'mjoho engo so'mo intofohumatɨ'mentisofoho. Hofɨko oso ahwomo nano homo somta'ni misɨhuto'nɨfitnnehofo. Oso hopo sopo nohumafɨkuji hofɨko Anɨtuye Sɨkuno Engo somo hungkuno ikwolofo'ne so'no hontohumalofo. 7Ou, sekwo nom'ne so'no fɨsyafɨhupmno. A'amu Soutom Ngkumoula so'nji nom'ne pone mofone soponjo so'nji hofɨko a'amu ahwomomjo sohwa a'mohufo imentohofo hopa imentohofofoho. Oso'nji hofɨko kifosyoho'nji loho'nɨmotofofoho. Oseso Anɨtu kako hofɨkoe honɨngkano wonyo somne'no tohino engo uyɨmentisofoho. Oso tohino hiso hofɨko tohomo ne'no humentanɨngkofi tohino umnalofoho. A'amu osomne'no syofɨsyontani iyoho nenɨngkahonɨngki nakwo huno ole nayohi, A'amu honɨngkano wonyo yɨwo'nɨngkohofoso tohino engo womantɨfeho.

8I olohonta oso a'amu sekwo'nji uhu'mokuwo'nɨngkohofoso hofɨko oso yahino hiso pa'nyo yalokwofo. Yo'mayo wojo uhwonontɨfi oso mta'ni yokumpohn'nyo tɨpemantɨfi hofɨkoe a'apahomo wonyo loho'nɨwo'nɨngkohofofoho. Oseso hofɨko nakwoe Hwe Engo sohumo yokumpohn'nyo ulohofontɨfi a'amu ahwomomjo wonyoangkafo somo sitofo ulɨwo'nɨngkohofofoho. 9Anɨtuye a'amu ahwomo mta'ango sɨmo'mjo sohwo Maikel oso hwo'nji kako Seten'nji siko Mousesɨye pijafoso mayo'ne yoka hnnɨmentisiyefoho. Siko oso yoka hungkunoso nohnnonji Seten kako Maikelɨmo sitofo ulahonɨngki oso'no Maikel kako Setenɨmo sitofo aku mulɨmentisofoho. O'o, olo'nohini ulɨmento, Hwe Engo Anɨtu sohwo kako kikimo yoka hungkuno wakilono. Oso'nohini ulɨmentisofoho. 10I oso a'amu huhwo sohwa hofɨko sekwo'nji humalofo sohwa hofɨko yo'mayo hwapɨngo ne so'no huno nto'no muyahonɨngki hofɨko sitofo hungkuno lɨwo'nɨngkohofofoho. Oso a'amu yahu pa'nyo sohwa hofɨko hofɨkoe a'apahomnohini syafɨsyontɨfi hofɨko yo'mayo wonyoso iwo'nɨngkohofofoho. Oso'no hofɨko nɨhu'nahone wonyo imo'nnyoso tɨkanomnefoho. 11Hofɨko tohino engo mapitnnefoho. A'amuso hofɨko Atamɨye hwomu Kein kako konɨngkwa'wehumo fonjahumentiso oso hwoe yahinoso mantɨfi yalokwofo. U nom'nihwo Mpelam sohwo kako hamniyoho engo ma'mne'ento kako a'amu Isɨlael somo hwasyo honɨngkanomo ipemotamentisofoho. Oso pa'nyoso olo a'amu lohwa yalokwofo. U nom'nihwo Koula kako Anɨtumne'no yokumpohn'nyo imo'nɨmentiso pa'nyoso olo a'amu lohwa yalokwofo. Oso'no Anɨtu kako hofɨkimo fonjasyonefoho.

12Sekwo Anɨtuye a'amu ne soku sekwo sɨmeho afa inɨngkuji nom'ne a'amumne'no wasemo'nono. Oso'no sekwo nuhu'mokontɨfi wopayo nontɨfi Jisasɨmne'no syafɨsiyo'ne wopayo'nji mijo'nji nyo sohonta hofɨko wonyo so'nji sekwo'nji nuhu'mokontɨfi oso uhu'mɨngo homo somo wonyo imokuwo'nɨngkohofofoho. Hwapɨngoso hofɨkoe honɨngkano wonyo somne'no wonɨmango munɨngkahonɨngki hunoso hofɨkine'nohini syafɨhu'nontɨfi wopayo nɨwo'nɨngkohofofoho. I oso'no hofɨko nom'ne a'amu somne'no huno monosyafɨhu'nɨwo'nɨngkiyohofo. A'amu hiso olo pa'nyofoho. Hwaho hoho'm hoho'minnyo sohwo kako ifoyo'no hontohumanteso himo kako ifoyo ane'njo sohwo nopahonɨngki ifoyo masiyo'njo yahonɨngki ifofo nɨhu'nahone motole'ofalofoho. Oso a'amu hiso hofɨko oso himo ifoyo ane'njo sohwo pa'nyo hwafoho. Ne anefoho. U nom'ne hungkuno upa'nɨmno. Oso a'amu sohwa hofɨko oso iyo kakoe sɨkuno somo ipisayo into'nyo sohonta ne ane imo'nyo oso pa'nyo hwafoho. Oseso iyo hiso kakwo'yohwo kako pmpongo hi'nji yofɨhwosi tohomo ho'nayofonefoho. Oso a'amu hiso oso pa'nyofoho. 13Oso a'amu oseso hofɨko hofɨkoe honɨngkano wonyo somne'no wonɨmango munyo'njoso utɨhwa'nyopo yontɨfi hofɨko olo pa'nyofoho. Mijo ifofayo yonto yo'mayo hintalinyo ifohulijisyafɨhwo'nɨngkiso pa'nyo hwafoho. Hofɨko hntokwaliyo ifufosonto sɨkwo'mjoho'mo imo'naofɨwo'nɨngkiso pa'nyofoho. Anɨtu kako oso a'amu homo somne'no hofɨko'ne nohumafitnne'ento ango nɨhu'no sɨkwo'mjohoso nto'no esyohumamentisofoho. Oso hopo sopo hofɨko ne'no nohumantokutnnefoho.

Hofɨko honɨngkano wonyomne'no tohino engo mapitnnefoho.

14Atamɨye imu sohwa mjɨmo'nɨmopontɨfi aho fehohnjo hopi'nono imo'nonto nom'ne mta'ni hufa'u imo'nɨmentiso sohonta Inouk humamojofoho. Oso a'amu huhwo sohwamne'no kako Anɨtuye hungkuno ole lɨmento, Hwe Engo sohwo kako kakoe a'amu ahwomomjo pi'nɨngo engo so'nji motapiso uhwonɨngkohefoho. 15A'amu Jisasɨye hungkunomo tɨfi minɨngkayo'njo somo hungkuno ikwolofo'ne sopono uhwajonefoho. Oso a'amu huhwo sohwa hofɨko Anɨtumne'no hohujo ikinjaofontɨfi honɨngkano nɨhu'no wonyo yontɨfi Anɨtumo sitofo hungkuno nɨhu'no wonyo ulɨwo'nɨngkohofofoho. Oso'no hofɨko hofɨkoe yahino wonyomne'no tohino engo womantɨfeho. 16A'amu huhwo sohwamo yo'mayo u'mante so'no nakwolaho lontɨfi wonyo hungkuno lɨwo'nɨngkohofofoho. Nom'ne a'amu sohwamne'no hofɨko hwasyo hungkuno somjɨlɨwo'nɨngkohofofoho. Oso a'amu huhwo sohwa hofɨko oso honɨngkano wonyo homo somne'no hofɨkoe sɨmeho fefoyo uyahonɨngki oso homo somo inɨngkawowo'nɨngkohofofoho. Oso a'amu huhwo sohwa hofɨko hofɨkoe yofe woho'nomo'nano lontɨfi hofɨko mango engo lɨwo'nɨngkohofofoho. Oso a'amu hiso hofɨko nom'ne a'amu somta'ni hofɨkoe yo'mayoso siki mayo'ne afofo hungkuno ulɨwo'nɨngkohofofoho.

Sekwo Anɨtuye hungkunomo sɨmeho hi'ntnnono uyɨkuji aho yokumpohn'nyo fɨkemokosyohumamno.

17I oseso Anɨtuye a'amu kakoe hungkuno lɨku'mofɨwo'nɨngkohofo (apousel) sohwa hungkuno selɨmentohofo so'no huno fɨsyafɨhupmno. 18Hofɨko sekumo ole selɨmentohofi, Sɨkuno moi'wo imo'noso sohonta a'amu hofɨko i'mofapɨkuji Anɨtuye hungkuno somne'no tɨkafo jɨfitnnefoho. Hofɨko Anɨtuye hungkuno somne'no hohujo ikinjaofɨkuji honɨngkano wonyo somne'no hofɨkoe sɨmeho fefoyo uyonefoho. Ose selɨmentohofofoho. 19A'amu hiso hofɨko Anɨtuye Towahuno ane nohumantɨfi hofɨko yo'mayo hwahoponjo so'nohini syafɨsyontɨfi hwasyo hungkuno losetɨhwawo'nɨngkohofofoho. Sekwo oso hwasyo hungkuno hiso nupa'nontɨfi husilo husilofo lohofalokwofo.

20U sekwo nje a'amu soku, sekwo oso yahinoso ikutoho. O'o, sekwo sekwoe sɨmeho hi'ntnnono kiho'maso wopɨngo'nohini Anɨtumo uyalokwofoso yokumpohn'nyo fisosofito'nɨmno. Anɨtuye Towahuno Wopɨngo kako sekumo kakoe yokumpohn'nyo sejapeso so'no sekwoe sɨmeho mo'mo yo'mayo Mpohwo wonejapono lɨkuji oso homo somne'no Mpohumo jomo ulɨmno. 21Sekwo nohumafɨkuji Anɨtu sekumne'no hitoho ulofɨwo'nɨngkiso so'no huno ne'no syafɨsyɨkuji oso huno homo somo aho yokumpohn'nyo fɨkemokosyohumamno. Sekwo osopo nohumafɨkuji nakwoe Hwe Engo Jisas Kɨlaisɨye hitoho engoso ujo ehontojwasiyo'ne sɨkuno so'no fohontohumamno. Nohontohumafɨkujo'no kako songo ne'no humayoso wosejapmmontonoho. 22A'amu hofɨko Anɨtuye hungkunomne'no huno ito'no mosyafɨsiyo'njo somne'no hitoho selofɨhwoso'no Anɨtuye honɨngkano tɨpemayo'neso ufo'mapmno. 23A'amu tɨkanomo walokwofo somo sekwo hofɨkimo komo'no utɨmapmno. Nutɨmafɨkuji sekwo hofɨkimo ufo'mapmno. A'amu honɨngkano wonyo'njo somne'no hitoho selofɨhwoso'no sekwo Anɨtuye honɨngkanomo tɨpemayo'ne hofɨkimo ufo'mapmno. Nufo'mafɨkuji hofɨkimo wopɨngo ulohopmno. I oso'no sekwo hofɨkoe honɨngkano wonyo somne'no i'waho nto'no fiyɨmno. Oso honɨngkano wonyo kiho'njo homo somo ipenemotafitnnoho lɨkuji i'waho fiyɨmno.

Jut kako Anɨtuye yofe ho'noma'mentisofoho.

24Anɨtu kako sekwo mopɨwasiyo'ne nto'no semokosyohumayoso hoponoho. Yo'mayo Jisas Kɨlais sekumo seloho'mentiso so'no sekwo honɨngkano wonyo ane'njo kakoe ango wonyoangkafo sopo kako humaso hopo sopo motasesiyoso hoponoho. Oso'no sekwo osopo kako'nji nohumafɨkuji sɨmonyo engo uyantɨfeho. 25Nakwoe Anɨtu nɨhu'no anga'nohino sohwo kako yo'mayo nakwoe Hwe Engo Jisas Kɨlais naloho'mentiso so'no asomo netɨmane hweho. Oso'no nakwo kakoe yofe woho'nomano. Kako nakumo nemokosyohumayoso nakwoe Hwe Engo ne hweho. Kako yo'mayo hopi'nonohino somo hulɨ'mokomokosyohumawo'nɨngkiso sohwo kako oso yo'mayo homo somo kakoe yokumpohn'nyoso hwofilo'nnyo'njo hweho. Kako sɨmo'mta'ango sohwo ne'no mjohumamopɨhwosi olohonta ne'no humahwosi hwangku kako ne'no mjohumamɨwene hweho. Oso'no engolopohamo kakoe yofe woho'nomehwano.

Olo hungkuno loso nehopeho. Ngko Jutɨ'ni mtɨ'mokohono. Hungkuno osohopeho.